Jose Mourinho ayaa loo magacaabay tababaraha cusub ee kooxda kubadda cagta ee Roma, Mourinho ayaa bishii dhamaatay ee April laga eryey kooxda Tottenham, kadib 17 bilood oo uu laylinayey kooxdaas horyaalka Ingiriiska ka tirsan.
Tababarahan reer Portugal ayaa dib ugu soo laabanaya horyaalka Serie A-da ee Talyaaniga, asagoo horay labo koob kula guulaystay kooxda Inter Milan kahor inta uusan aadin Real Madrid sanadkii 2010-kii, waa 58-sano jir waxuuna badeli doonaa tababarihii kooxdan Paulo Fonseca, kaas oo Portugal ay kasoo wada jeedaan.
Paulo Fonseca ayaa kooxda Roma ka tagi doona dhammaadka xilli ciyaareedkaan,sida ay maanta shaacisay kooxdu. Kooxdaan Roma ee haatan uu tababaraha u noqanayo Jose Mourinho, kuma aysan guulaysan horyaalka Serie A-da Talyaaniga tan iyo sanadkii 2000 โ 2001-dii.
