Dowlad Goboleedka Jubbaland ayaa soo dhaweysay heshiishka dhexmaray Dowladda Federaalka ah iyo Midowga Murashaxiinta ee ka dhacay magaalada Muqdisho.
Bayaanka ka soo baxay Dowlad goboleedka Jubbaland ayaa lagu yiri “Jubbaland waxay ka rajaynaysaa Dowladda Federaalka ah inay wax ka badasho qaabka ay ula dhaqmayso musharaxiinta mucaaradka, iyadoo loo baahan yahay in ay la imaato xal la xiriira caqabadaha kale ee ku xeeran qabashada shir wadatashi ah oo loo dhan yahay oo lagu dhameystirayo arrimaha muranku ka jiray si ay u abuuranto jawi qabsoomidda doorasho ku dhacda si nabad ah oo wadar ogol ah taas oo waafaqsan heshiiskii 17 September habraacyadii lagu heshiiyey iyo Shuruucda dalka”.
Dowlad Goboleedka Jubbaland ayaa ugu baaqday Dowladda Federaalka ah inay garowsato in saamileeyda siyaasadda iyo musharaxiinta ay xaq u leeyahiin ka qeyb galka daadalada socda ee la xiriira go’aan ka gaarista hanaanka Doorashada.
