Kulankan ayaa qeyb ka ahaa xuska 16 maalmood oo caalamka u asteeyay in loo ololeeyo ka hor tagga xadgudubka Jinsiga, kaas oo ay soo qaban qaabisay safaaradda UK ee Soomaaliya, waxaana hal ku dhega sanadkan uu yahay “Yaan loo ka la harin la dagaallanka xadgudyada ka dhanka ah Haweenka”.
Danjiraha UK ee Soomaaliya David Concar oo khudbad u jeediyay ka qeybgaliyaasha kulanka ayaa sheegay in dowladiisa ka go’an tahay dabar goynta xadgudub nooc kasta oo ka dhan ah Haweenka iyo gabdhaha yar yar, isagoo Haweenka Soomaaliyeed ku amaanay dadaalka ah ugu jiraan helitaanka xuquuqda aas aasiga ah, waxaana uu xusay in UK ay taageereyso dadaal kasta oo lagu caawinayo dadka nugul oo ay ugu horeeyaan Haweenka iyo Carruurta.
Guddoomiye ku-xigeenka gobolka Banaadir ee Maamulka iyo Maaliyadda Maluuka Xaaji Dheer ayaa sheegtay in wax badan iska bedeleen xadgudubka ka dhanka ah haweenka Soomaaliyeed isla markaana loo baahan yahay in sharciyada arrintaas xoojinaya la dedejiyo…
Wasiirka Haweenka iyo Xuquuqul Insaanka ee dowladda Soomaaliya Deeqa Yaasiin, oo kulanka ka qeybgashay ayaa Warbaahinta Qaranka ugu warbixisay ahmiyadda 16 maalmood ay leedahay, iyadoo tilmaamtay in barnaamijkan uu soo bilowday 25-kii bishan, lana filayo in la soo gabo gabeeyo 10-ka December oo ku beegan maalinta Xuquuqda Aadaha.
Sanad kasta, waxaa caalamka laga sameeyaa ololaha la dagaallanka xadgudubka Jinsiga oo soconaya 16 maalmood, Soomaaliya ayaana kamid ah wadamada laga ololeeyo maadaama dhibaatada laga hadlayo ay si weyn u taabaneyso nolasha in ka badan nus kamid ah bulshada Soomaaliyeed.
