Kulan looga Hadlayay Ka Ganacsiga Alaabaha Sharci Darada ah islamarkaana ay ka qeybgaleen ganacsatada Ajaanibta Iyo Kuwa South africaanka ah ayaa Lagu qabtay Magaalada Johannesburg ee Dalka Koonfur Africa
Shirkani oo ahaa mid ay soo qaban qaabisay Hey’ada la dagaalanta ka ganacsiga alaabaha sharciyeysan ee been abuurka ah oo magaceeda loo soo gaabiyo “CFC” islamarkaana ay ka soo qeyb galeen ururada ganacsiga dadka ajaanibta ah ay ku leeyihiin gobolka Gueteng ee Dalka koonfur Africa ayaa waxaa lagu qabtay xafiiska Soomaali Community Board ee South Africa .
Ururada shirkani soo xaadiray waxaa ka mid ahaa Waaxda Canshuuraha South africa ,midowga ganacsatada yar yar iyo dukaanleyda South Africaanka ah,hey’adda horumarinta ganacsiga magaalooyinka iyo waliba jaaliyada Soomaalida South Africa iyo ganacsatada kale ee ajaanibta ah waxaana inta uu kulanka socday si weyn loogu lafa guray qaabka looga hor tagi karo la isagana kaashan karo sidii loo joojin lahaa ka ganacsiga alaabaha sharci darada ee been abuurka ah.
Guud ahaan qeybaha kale duwan ee shirka ka qeybgalay ayaa wada saxiixay heshiis ah in guud ahaan dukaamada ganacsiga laga joojiyo in lagu iibiyo alaabaha ganacsi ahaan loo keeno dalka koonfur Africa kuwaa oo si been abuur ah loo soo sameeyay.
Abdirisaaq Maxamed Geedi oo ka tirsan jaaliyada Soomaalida Community Board ee South Africa ayaa sharaxaya Qaabka Loo Wada Gaarsiiin Karo sharcigaan Guud ahaan Goobaha Ganacsiga Gaar ahaana kuwa Soomaalida.
“Sida aad u Jeedaan warqadaan waxaa Daba Socda Warqado yaryar oo loo geynayo goobaha ganacsiga ay saxiixayaan kadibna waxaa loo sheegi doonaa waxa daba socda hadii qofka uu ka ganacsado alaabahaas oo kale wax uu la kulmi doono talabaada laga qaadan doono”
Waxaa sido kale ka mid ahaa Xubnahii Saxiixay Hishiiskaan hogaamiyaha midowga ganacsatada iyo Dukaanleyda Koonfur Africa haweeneyda Lagu magacaabo Rose Nkosi ayaa sheegtay in markii hore ay cabashooyin badan ka qabeen dadka ajaanibta ah ee iibiya alaabaha ganacsiga ee sharci darada ah lakiin hada ay ku faraxsan tahay in ay saxiixayaan heshiiskaan islamarkaana ay wada shaqeyn la sameyn doonaan hada waxii ka dambeeya.
Jaaliyada Soomaalida iyo ganacsatada kale ee ajaanibta ah ayaa looga fadhiyaa in ay meel mariyan sharcigaan islamarkaana ay gaarsiiyaan guud ahaan ganacsatada ku nool deegaanada iyo tuulooyinka dalka koofur Africa.
Sawir Qaade:C/laahi Maxamuud Amiin”C/laahi Qorshe, Johannesburg Koofur africa
