Kulan ay isugu yimaadeen mas’uuliyiin kala duwan oo lagu qabtay Hotel Maka Al-mukarama ee magaalada Muqdisho ayaa waxaa looga hadlayay doorka haweenka Soomaaliyeed ay ku yeelan karaan siyaasadda iyo hogaaminta dalka. kulanka ayaa waxaa soo qaban qaabiyay hey’adda SOYDEN oo kaashanaysa hey’adda UN-WOMEN.
Kulanka ayaa waxaa dadkii ka qeybgalay kamid ahaa culimada diinta, ururka haweenka qaranka, kan gobolka Banaadir, dadka naafada ah, ganacsato iyo safiir sharafeedka haweenka Soomaaliyeed u qaabilsan xaqiijinta koontada haweenka ay ku leeyihiin hogaanka siyaasadda dalka.
Intii kulanka uu socda ayaa waxaa laga dooday qodobo kala duwan oo muhiim u ahaa mowduucan laga hadlayay oo ay kamid aheyd tirada haweenka Soomaaliyeed ay ku yeelan karaan baarlamaanka soo socda iyo sida arintaas lagu gaari karo.
Mas’uuliyiintii kulanka ka hadlay ayaa waxaa kamid ahaa Xasan Axmed Sadiiq iyo Baarliin Maxamed Cadaani oo ka socday gudiga dowladda Soomaaliya u xil saartay xaqiijinta koontada haweenka ee siyaasadda Soomaaliya.
Sidoo kale, kulanka waxaa ka hadlay qaar kamid ah haweenkii ka qeybgalay waxayna sheegeen ahmiyadda ay haweenka u leedahay ka qeybgalka hogaanka siyaasadda dalka.
Gunaanadkii kulanka ayaa waxaa laga soo saaray qodobo lagu xoojinayo go’aanadii horey looga soo saaray ka qeybgalka siyaasadda ee haweenka Soomaaliyeed.
