Dowladda Kenya ayaa sheegtay in labo Milyan oo lacagta Kenya ah ay siineyso qofkii keenaa macluumaad sahlaya in lasoo qabto Cabdullahi Cabdi Sheekh oo ka tirsan horjoogayaasha Shabaab.
Wasaaradda arrimaha gudaha iyo Xafiiska Kormeeraha guud ee Kenya Jeneraal Joseph Boinnet ayaa sheegay in horjooge Cabdullahi uu hubeysan yahay islamarkaana uu halis ku yahay ammaanka.
Booliska Kenya ayaa tuhunsan in Ninkaan uu qorsheynayay Weeraro xiriir ah oo uu ka geysto dalka Kenya, kuwaaso ay ka mid yihiin weerar uu la damacsanaa Magaalada Lamu oo fashilmay.
Sidoo kale Booliska ayaa rumeysan in Sarkaalkaan uu door weyn ku lahaa ama wax uu wax ka qorsheeyay weeraradii ka dhacay deegaanka Booni ee ka tirsan Magaalada Lamu.
Dowladda ayaa ugu baaqday Dadka inay feejignaadaan soona sheegaan dhaqdhaqaaq kasta oo Qatar ku ah ammniga, iyada oo Saldhigyada Booliska la faray in ay qaadaan tallooyinka ugu haboon ee la xiriira sugidda nabad galyada.
Horjooge Cabdullahi Cabdi Sheekh oo la rumeysan yahay in uu ka soo jeedo Soomaaliya ayaa sawirkiisa waxa uu ka soo muuqday, muuqaal laga helay Nin ka tirsan Al Shabaab oo Ciidamada Kenya ay ku dileen howllgalkii Deegaanka Baure
Ciidamada Kenya ayaa qeyb ka ah howllgalka AMISOM ee Soomaaliya iyaga oo dowladda Federaalka ka taageeraya dagaallada ka dhanka Maleeshiyaadka Al Shabaab.
