Dowladda Kenya ayaa ugu baaqday hay’adda Q.M u qaabilsan arrimaha qaxootiga ee UNHCR in ay taageerto go’aankeeda ku aadan dib u celinta qaxootiga Soomaaliyeed ee ku sugan xeryaha Dhadhaab.
Afhayeenka Madaxtooyada ee dalka kenya Manoah Esipisu oo la hadlayay warbaahinta ayaa sheegay in Madaxweynaha Kenya Uhurru Kenyatta iyo Madaxa Hay’adda Qaramada Midoobay u Qaabilsan Qaxootiga ee UNHCR Filippo Grandi oo kulan ku yeeshay magaalada Nairobi ay ka wada hadleen arrimo la xiriira dib u celinta qaxootiga Soomaaliyeed ee ku dhaqan xeryaha Dhadhaab.
Wuxuu tilmaamay in Madaxweyne Uhurru uu ka dalbaday UNHCR in ay si cad u taageerto go’aanka dowladda Kenya ee ah in dalkooda dib loogu celiyo Qaxootiga Soomaaliyeed, maadama xaaladda dalka Soomaaliya ay iminka wanaagsantahay.
Madaxa Hay’adda Qaramada Midoobay u Qaabilsan Qaxootiga ee UNHCR Filippo Grandi ayaa dhankiisa sheegay in ay diyaar u yihiin sidii Dowladda Kenya ay ugala shaqeyn lahaayeen dib u celinta qaxootiga Soomaaliyeed, balse ay mudantahay in la tixgaliyo sharciga caalmiga ah ee qaxootiga.
Dowladda Kenya ayaa dhowr jeer oo hore ku nuuxnuuxsatay in qaxootiga Soomaaliyeed ee ku nool dalkeeda looga baahanyahay in dalkooda ay dib ugu noqdaan, si ay uga qeybqaateen horrumarkiisa.
