Kooxda Roma oo kaalinta labaad uga jirto horyaalka talyaaniga ee Serie A-da ayaa galabta iska qasaarisay fursad ay ugu dhawaan lahayd kooxda Juventus oo hogaamineyso horyaalka talyaaniga,ka dib markii ay garoonkeeda Stadio Olimpico barbardhac 0-0 ah kula gashay kooxda Parma.
Kooxda Roma oo uu hogaamiyo macalin Rudi Garcia ayaa bareejo gashay afar ka mid ah lixdii kulan ee ugu danbeysay horyaalka talyaaniga ee Serie A-da .
Kooxda Roma ayaa kaalinta labadaa uga jirto kala horeynta horyaalka talyaaniga,waxana ay leedahay 47-dhibcood,halka kooxda Parma ay ka mid tahay sedaxda kooxood ee ugu hooseeya horyaalka.
Kooxda Udinese ayaa waxaa garoonkeeda Stadio Friuli 0-1 uga badiyay kooxda Lazio.
Ciyaaryahan Antonio Candreva ayaa daqiiqadii 23-aad ee ciyaarta goolka guusha oo rigoore ahaa u dhaliyay kooxda kooxda Lazio.
Kooxda Lazio ayaa kala horeynta horyaalka talyaaniga uag jirto kaalinta shanaad,waxana ay leedahay 37-dhibcood,halka kooxda Udinese ay horyaalka uga jirto kaalinta 13-aad,iyadoo leh 28-dhibcood.
Kooxda Genoa ayaa markii u horeysay ilaa 7-dii bishii December ku badisay garoonkeeda Luigi Ferraris stadium,waxana ay 5-2 uga badisay kooxda Hellas Verona.
Ciyaaryahan M’baye Niang ayaa labo ka mid ah goolasha u dhaliyay kooxda Genoa,halka labada gool ee kale ay u kala dhaliyeen ciyaaryahanada kala ah Andrea Bertolacci iyo Diego Perotti.
Ciyaaryahan Luca Toni ayaa labada gool u dhaliyay kooxda Hellas Verona.
Kooxda Genoa ayaa kala horeynta horyaalka talyaaniga uga jirto kaalinta lixaad,waxana ay leedahay 35-dhibcood,halka kooxda Hellas Verona ay horyaalka uga jirto kaalinta 16-aad,iyadoo leh 24-dhibcood.
Kooxda Inter Milan ayaa guushii labaad oo isku xiga,ka dib markii ay 4-1 uga badisay kooxda Atalanta.
Ciyaaryahan Fredy Guarin ayaa labo ka mid ah goolasha u dhaliyay kooxda Iner Milan,halka labada gool ee kale ay u kala dhaliyeen ciyaaryahanada kala ah Xherdan Shaqiri iyo Rodrigo Palacio.
Kooxda Inter Milan oo uu hogaamiyo macalin Roberto Mancini ayaa habeenka khamiista koobka Europa League-ga la ciyaari doonto kooxda Celtic.
Kooxda Inter Milan ayaa kala horeynta horyaalka talyaaniga uga jirto kaalinta tobanaad,waxana ay leedahay 32-dhibcood,halka kooxda Atalanta ay horyaalka uga jirto kaalinta 17-aad,iyadoo leh 23-dhibcood.
Kooxda AC Milan ayaa garoonkeeda San Siro bareejo 1-1 ah kula gashay kooxda Empoli.
Kooxda AC Milan ayaa goolka la hor martay,waxaan dhamaadkii qeybtii hore ee ciyaarta u dhaliyay ciyaaryahan Mattia Destro oo dhawaan si amaah ay ugala soo wareegeen kooxda Roma.
Ciyaaryahan Massimo Maccarone ayaa qebtii danbe ee ciyaarta goolka bareejada u dhaliyay kooxda Empoli.
Garsoorihii ciyaarta Paolo Valeri ayaa dhamaadkii ciyaarta kaarka casaanka ah u taagay gool-hayihii kooxda AC Milan Diego Lopez,ka dib uu kubadda ku taabtay banaanka xariijinta 18-ka.
Kooxda AC Milan ayaa kala horeynta horyaalka talyaaniga uga jirto kaalinta 11-aad,waxana ay leedahay 30-dhibcood,halka kooxda Empoli ay horyaalka uga jirto kaalinta 14-aad,iyadoo leh 24-dhibcood.
