Kooxda AC Milan ayaa kooxda Parma kala soo wareegtay ciyaaryahan Gabriel Paletta oo daafaca ka ciyaara,iyadoo sidoo kale kooxda Genoa kala wareegtay ciyaaryahan Luca Antonelli oo khadka dhexe ka ciyaara.
Ciyaaryahan Paletta oo daafaca dhexe ka ciyaara ayaa bilihii ugu danbeeyay si weyn loola xiriirinayay kooxda AC Milan.
Qoraal ka soo baxay kooxda AC Milan ayaa lagu sheegay in kooxda ay si rasmi ah ciyaaryahan Gabriel Paleta ugala soo wareegtay kooxda Parma FC,isagoo saxiixay qandaraas gaaraya ilaa 30 bisha June ee sanadka 2018.
Tababaraha kooxda Parma Roberto Donadoni ayaa ciyaaryahan Paletta kursiga keydka uga soo tegay ciyaartii ay xalay kooxda AC Milan 3-1 uga badisay kooxda Parma,maadaama la xaqiijiyay in uu kooxda ka tegayo.
Dhinaca kale kooxda AC Milan ayaa kooxda Genoa kala soo wareegtay ciyaaryahan Luca Antonelli oo khadka dhexe ka ciyaara.
Ciyaaryahan Luca Antonelli ayaa kooxda AC Milan u saxiixay qandaraas gaaraya ilaa sanadka 2018.
