Kooxo bistoolado ku hubeysnaa ayaa saaka weerar ku qaaday Laba gabdhood oo walaalo ah oo ku sii jeeday Iskuul xilli ay marayeen xaafadda macalin Nuur ee degmada Dharkeynleey.
Labada Gabdhood ee ay weerarka ku qaadeen kooxaha hubeysan oo da’dooda lagu qiyaasay 16-18 sano jir ayaa mid ka mid ah goobtii lagu toogtay ku geeriyootay, halka tan kale uu soo gaaray dhaawac halis ah, waxaana loo qaaday goobaha caafimaadka.
Dadka deriska la ahaa gabdhahaasi ayaa muujiyay sida ay uga argagaxsanyihiin dilka gabdhahaasi oo ay sheegeen ineysan waxba galabsan.
Ciidamada ammaanka ee degmada Dharkeynley ayaa gaaray goobta lagu dilay ardaydaasi, waxeyna billaabeen baaritaanno la xiriira dilka loo geystay gabdhahaasi abriyada ah.
Dhinaca kale kooxo hubeysan ayaa haweeneey da’ ah xalay ku dilay xaafadda Sey Biyaano ee degmada Hodan lamana oga sababta rasmiga ah ee ka dambeysay dilka hooyadaasi oo caan ka aheyd degmada Hodan.
