Tababbar aqoontooda kor loogu qaadayo kormeerayaasha Dugsiyada Dowladda ayaa maanta ka furmay magaalada Muqdisho.
Furitaanka tababarkan ayaa waxaa goob joog ka ahaa agaasimaha Guud ee Wasaaradda Waxbarashada Xassan Maxamed Cali, agaasimaha dugsiyada Wasaaradda Waxbarashada Muuse Caraale iyo Agaasimaha Manhajka Maxamed Mukhtaar.
Tababarkan ayaa waxaa ka qeyb galaya 58-kormeere kuwaasi oo loogu talo galay inay la socdan buugaagta manhajka cusub ee dhawaan ay qeybisay Wasaaradda Waxbarashada Xukuumadda Federaalka Soomaaliya.
Arrimaha kale ee lagu baran doono tababarkan ayaa waxaa ka mid ah hubinta xogta macalimiinta, si loo helo isla xisaabtan dhab ah.
Agaasimaha Guud ee Wasaaradda Waxbarashada Xukuumadda Federaalka Soomaaliya Mudane, Xassan Maxamed Cali oo daah furay tababarkan ayaa kula dardaarmay xubnaha ka qeyb galaya inay ka faa’ideystan.
“Dhamaantii waxaa la idinka rabaa inaad si dhab ah uga soo baxdan howsha la idin xil saaray, islamarkana aad la socotan buugaagta manhajka cusub iyo sida loo qaadanayo, iyo hubinta macalimiinta”ayuu yiri agaasimaha guud ee Wasaaradda Waxbarashada Mudane Xassan Maxamed Cali.
Wasaaradda Waxbarashada Xukuumadda Federaalka Soomaaliya ayaa dhawaan la soo wareegtay 24 iskuul oo ku yaalla gobolka Banaadir, iyadoo si lacag la’aan ah ay wax uga bartan caruurta Soomaaliyeed.
