Faah faahin dheraad ah ayaa ka soo baxaysa weeraro xagga cirka iyo dhulka ah oo lagu qaaday fariimo maleeshiyada Al-Shabaab ay ku lahaayeen deeganka Awdheegle ee gobolka Shabeelaha Hoose.
Guddoomiyaha Deegaanka Awdheegle ee gobolka Shabeelaha Hoose Maxamed Aweys Abuukar oo la hadlay Radio Muqdisho ayaa tilmaamay in xalay saqdii dhexe weerar xagga cirka ah oo ay fuliyeen diyaarado dagaal iyo ciidamo dhulka ka dagaalamayay oo lagu qaaday saddex xarun ay maleeshiyada Al-Shabaab ku lahaayeen deegaanka Awdheegle, halkaasi oo lagu dilay ku dhawaad 20 Al-Shabaab ka tirsan.
“Way jirtaa in xalay saqdii dhexe weerar diyaarado xaga hawada ka dagaalamayay iyo cidamado dhulka ah ay howlgal ka fuliyeen, 3 xarumood ayaa la weeraray, 11 ayaa howlgalka looga dilay, waxaa kaloo jirta in afar meyd ah laga helay dhulka beeraha, hadana afar kale ayaa la soo sheegay in meydadkooda ay ka qaateen meel u dhaw meesha la weeraray, tirada waxa ay ku sii dhawdahay 20 ka tirsan maleeshiyada Al-Shabaab” ayuu yiri Guddoomiyaha deegaanka Awdheegle.
Guddoomiyaha ayaa tilmaamay in deegaanka Awdheegle ay iminka degantahay, isla markaana ay isaga carareen maleeshiyada Al-Shabaab ee ku dhuumaleysanayay deegaankaasi.
