Munaasabadaan ku saabsaneyd qalin jebin Qur’aanka Kariimka Dufcaddii saddexaad ee M’asasad Umul Qura oo ay ka qalan jabinayeen 23 aday oo todobo ka mid ah ay gabdho yihiin, kuwaasi oo ka mid ah carruurta agoonta ee wax ka barta Mu’asasad Umul Qura ayaa waxaa ka qeyb galay waalidiin, carruurta qalin jebineysa iyo marti sharaf kale.
Ugu horeyn xafladda qalan jebinta waxaa ka hadal kooban ka jeedisay mid ka mid haweenkii ka qeyb galay xafladda, iyadoo sheegtay in carruurta agoonta ah ee dhigata Mu’asasada Umul Qura ay ugu deeqeyso lacag dhan shan kun oo doolarka Mareykanka ah, iyadoo xustay in ay aad ugu faraxsantahay ka qeyb galka xafladda.
Sheekh Cumar Macalin Cabdi oo ka mid ah Culimaa’udiinka ayaa ka sheekeeyay faa’iidada ay leedahay in la kafaalad qaado waxbarashada carruurta agoonta ah ee wax ka barta Mu’asasada Umul Qura, isagoo intii carruurta wax u qabatay Alle uga baryay in uu ajar ka siiyo.
Khadiijo Maxamed Maxamuud oo ka mid ah aaas aasayaasha Mu’asasad Umul Qura ayaa uga mahadcelisay waalidiita sida ay carruurta ugu dhiiri geliyeen in ay wax ka bartaan Mu’sasada Umul Qura, iyadoo tilmaamtay in ay tahay wax lagu farxo in carruur sodon ku dhaw ay iminka yihiin dad xaafidu Quraan ah.
Mu’asasada Umul Qura ayaa ah goob Qur’aanka kariimka ah lagu baro carruurta agoonta, waxaana dufcadda iminka ka qalin jebisay ay noqoneysa tii saddexaad ee ka aflaxda Mu’asasad Umul Qura ee Muqdisho, waxaana gabo gabadii shahaadooyin la gudoonsiiyay carruurta ka qalin jebisay xaruntaasi.
