Qarax loo adeegsaday gaari ayaa ka dhacay maanta caasimadda wadanka Afghanistan ee Kabul ugu yaraan sagaal ruux ayaa ku geeriyootay waxaana bartilmaameedkiisu ahaa xildhibaan ka tirsan barlamaanka dalka, sida ay saraakiishu sheegeen.
Khan Mohammed Wardak ayaa ka badbaaday weerarka, iyadoo 20 qof ay ku dhaawacmeen oo ay ku jiraan haweenka iyo carruur, sida wasiirka arrimaha gudaha Afghanistan Mascuud Andarabi sheegay.
Ilaa iyo hadda ma jirto cid sheegatay mas’uuliyadda weerarka.
Afghanistan waxaa kordhay weerarada iyo qaraxyada todobaadyadii u dambeeyay iyadoo dowladda iyo Taliban oo wadahadal u socdo kaas oo la doonayo in lagu soo afmeero dagaalka ku dhowaad 20 sano ka socday dalkaas.
Dhinca kale, Axaddii qaraxyo ayaa laga soo wariyay gobolada Logar, Nangarhar, Helmand iyo Badakhshan, waxaana ku waxyeeloobay saraakiil ka tirsan ciidanka amniga.
Jimcihii qarax loo adeegsaday mooto Bajaaj ayaa dilay 15 ruux oo ay ku jiraan 11 caruur ah, dhibaatada ayaa ka dhacday gobolka bartamaha ku yaala ee Ghazni.
Wasiiradda arrimaha gudaha Afghanistan ayaa war qoraal ah ku sheegtay in Taliban dileen 487 oo rayid ah iyadoo laamaha amniga ku qaaday 35 weerar iyo 507 qarax guud ahaan dalka sadexdii bilood ee la soo dhaafay.
