Ku-simaha Guddoomiyaha Gobolka Banaadir Mudane Ciise Maxamuud Guure oo uu wehliyay Guddoomiye ku-xigeenka amniga iyo siyaasadda gobolka Banaadir mudane Maxamed Axmed Diiriye Yabooh, Xoghayaha Guud ee Gobolka Banaadir Mudane Feysal Caraale Afrax ayaa soo xiray Tababar muddo Shan cisho ah Magaalada Muqdisho ugu socday Guddoomiye Ku-xigeennada Degmooyinka ee arrimaha bulshada iyo siyaasadda sidoo kale hogaanka ururada dhallinyarada ee Degmooyinka iyo Deegaannada Gobolka Banaadir.
Tababarkaan oo ku saabsanaa Aqoonta Hogaaminta Maamulka Maxalliga (Dowladdaha Hoose) ayaa waxaa diiradda lagu saaray waajibaadka shaqo ee xubnaha Goloyaasha deegaanka, hogaaminta Ururada Dhallinyarada iyo u adeegidda Bulshada oo ka koobnaa mac’luumaad dhan 11 cutub.
Ku-simaha Duqa magaalada, Mudane Ciise Guure ayaa kula dardaarmay mas’uuliyiintii Tababarkan dhameystay in aqoonta ay ka faa’iideysateen ay ku saleyaan fulinta waajibaadka ay u haayaan Bulshada ku nool Caasimadda.
Munaasabada xeritaanka Tababarkaan ayaa waxaa goobjoog ka ahaa Guddomiyaha dhallinyarada Gobolka Banaadir, La-Taliyaha Duqa Magaalada ee dhanka Xuquuqda carruurta.
