Ku simaha Madaxweynaha dalka ahna Guddoomiyaha Baarlamaanka Federaalka Soomaaliya ayaa xafiiskiisa ku qaabilay xubno metelayey Xisbiyada siyaasadeed ee dalka ka jira kuwaasoo uu kala hadlay dhameystirka sharciga lagu dhisayo xisbiyada siyaasadeed ee dalka.
Kulankan uu ku simaha Madaxweynaha dalka ahna Guddoomiyaha Baarlamaanka Mudane Maxamed Sheekh Cusmaan “Jawaari” la qaatay xubnahan metelayey Xisbiyada Siyaasadeed ee dalka ayaa ka dhacay xarunta Villa Hargeysa ee magaalada Muqdisho waxaana intii uu socday looga hadlay muhiimadda uu leeyahay sharciga lagu dhisayo xisbiyada Siyaasadeed ee dalka oo ka mid ah howlaha laga sugayo Baarlamaanka Federaalka Soomaaliya.
C/laahi Sheekh Daahir iyo Zakariye Maxamuud Xaaji Cabdi oo u hadlay xubnaha metelayey Xisbiyada siyaasadeed ee dalka ayaa ka dalbaday Guddoonka Baarlamaanka iney dedejiyaan sharciga lagu dhisayo Xisbiyada siyaasadeed ee dalka iyo Xisbiyada hada jira fursad loo siiyo ka qeybgalka shirarka looga hadlayo masiirka umadda Soomaaliyeed.
Ku simaha Madaxweynaha dalka ahna Guddoomiyaha Baarlamaanka Federaalka Soomaaliya Mudane Maxamed Sheekh Cusmaan Jawaari ayaa u sheegay xubnaha uu la kulmay in sharciga lagu dhisayo Xisbiyada Siyaasadeed ee dalka uu soo diyaariyey Guddi hoosaad ka tirsan Baarlamaanka islamarkaana loo gudbiyey Golaha Wasiirrada oo hada lagu dhowrayo, Guddoonka iyo Baarlamaankana ay muhiimad gaar u leedahay sameynta sharcigan.
