Ku simahada Madaxweynaha dalka ahna Afhayeenka golaha shacabka Mudane Maxamed Sheekh Cismaan “Jawaari” ayaa hambalyo u direy Ciidanka Cirka Soomaaliya munaasabadda xuska sanad guuradii 55 aad awgeed taas oo naanta magaalada Muqdisho lagu qabtay.
Mudane Jawaari ayaa waxaa uu sheegay in Ciidanka cirka Soomaaliya uu kamid yahay tiirarka uu Qaranka Soomaaliyeed ku taagan yahay isagoo sidoo kale guud ahaan u hambalyeeyay dhammaan Ciidamada Xoogga dalka Soomaaliyeed gaar ahaan Ciidanka Cirka iyo kan Badda oo isna dhawaan u dabaal degay munaasabadda aas aaskiisa.
“Ciidanka Muhiimad weyn ayuu Qaranka ugu fadhiyaa, waxaa uu mas’uul ka yahay ilaalinta hawada Soomaaliya, waxaan balan qaadayaa in dhammaan Madaxtooyada, Xukuumadda iyo golaha shacabka ay ka go’an tahay dib u dhiska Ciidanka guud ahaan gaar ahaan kan cirka” ayuu yiri Ku simaha Madaxweynaha dalka Mudnae Jawaari.
Ku simaha Madaxweynaha dalka Mudane Maxamed Sheekh Cismaan “ Jawaari” ayaa sidoo kale u mahadceliyay mas’uuliyiinta ku howlan dib u soo nooleynta ciidanka Cirka ee Soomaaliya.
