Xafladani lagu soo gaba gabeynayay todobaadka dhir Beerista Soomaaliya oo ay ka qeyb galeen guddoomiyaha Baarlamaanka jamhuuriyadda Federaalka ah ee Soomaaliya ahna ku simaha madaxweynaha dalka , wasiirka dastuurka ahna ku simaha Ra’isul wasaaraha dalka, wasiiro ka tirsan xukuumadda Soomaaliya, Xildhibaanno Baarlamaanka Soomaaliya ka tirsan,wasiiro ka socday qaar ka mid ah maamul goboleedyada dalka ka jira, Xubno ka tirsan maamulka gobolka Banaadir, Ururka Haweenka Qaranka, qaar ka mid ah guddoomiyeyaasha degmooyinka gobolka Banaadir, iyo haween ka kala soday qaar ka mid ah degmooyinka gobolka Banaadir.
Hobolada Fanaaniinta Qaranka ee Waaberi ayaa inta ay xafldani socotay waxa ay soo bandhigeen suugaan iyo riwaayado ka turjumayay qiimaha 17-ka April ay u leedahay dalka iyo dadka iyo sidoo kale dhibaatada ay jerista dhirtu leedahay.
Guddoomiye ku xigeenka dhinaca siyaasadda ee maamulka gobolka Banaadir iyo guddoomiyaha ururka haweenka qaranka soomaaliyeed Marwo Batuulo Sheekh Axmed Gaballe ayaa si wadajir ah u ugu baaqay in qof walbo Oo soomaali ah uu ka qeyb qaato beerista dhirta.
Wasiirka dhalinyarada iyo isboortiga ee maamul goboleedka Soomaaliyeed ee Puntland C/raxmaan Sheekh Axmed oo ku hadlayay magaca madaxdii ka socotay maamul goboleedyada dalka ayaa sheegay in shacabka Soomaaliyeed ay dareemeen xanuunka ay leedahay In dhirta la jaro.
Wasiir ku xigeenka wasaaradda beeraha Soomaaliya ayaa ku baaqay In laga wada qeyb qaato soo celinta dhirta Soomaaliya si aysan nabaad guur u dhicin.
Wasiir ku xigeenka wasaaradda xanaanada xoolaha dirta iyo daaqa ee xukuumadda Federaalka Soomaaliya ahna ku simaha wasiiirka ayaa sheegay in wasaaradooda ay go’aansatay in shacabka Soomaaliyeed dareensiiyaan in ay tahay laf dhabarta bulshada.
Wasiirka dhalinyarada iyo Ciyaaraha ee Xukuumadda Federaalka Soomaaliya Mudane Maxamed C/llaahi Xasan ‘’ Nuux’’ ayaa sheegay in maalinta dhalinyarada Soomaaliyeed oo ku began 15-ka May wasaaradiisu ay hal saac ka mid ah maalintaas gelin doonto beerista dhirta.
Wasiirka dastuurka Soomaaliya ahna ku simaha Ra’isul wasaaraha dalka Mudane Xuseen Sheekh Maxamuud ayaa ku baaqay in la joogteeyo dhir beerista si looga baxo dhibaatooyinkii jarsita dhirta laga dhaxlay.
Guddoomiyaha Baarlamaanka Soomaaliya ahna ku simaha madaxweynaha dalka mudane Maxamed Sheikh Cismaan jawaari oo xafladda soo gaba gabeeyay ayaa sheegay in dadka ku howlan in si micno daro ah u jaraan dhirta Soomaaliyeed ay la mid yihiin kuwa cadowga ah ee u taagan leynta dhalinyarada Soomaaliyeed.
