Ku simaha Madaxweynaha dalka ahna Afhayeenka Baarlamaanka Soomaaliya Mudane Maxamed Sheekh Cismaan “Jawaari” ayaa maanta si wadajir ah kulan ula yeeshay Wasiirka Cusub ee Wasaaradda Dastuurka, Guddigga Baarlamaanka u qaabilsan arrimaha Dastuurka iyo Guddigga Madax banaan ee dib u eegista Dastuurka KMG ah waxaa kulanka uu ku saabsanaa dardargelinta howlaha lagu dhameystiraayo Dastuurka Qabiyada ah ee Soomaaliya.
Ka qeybgaliyaasha kulanka iyo ku simaha Madaxweynaha dalka ahna guddoomiyaha golaha shacabka ayaa is dhaafsaday fikiro wax ku ool ah oo Dastuurka iyo dhameystirkiisa quseeya.
Ku simaha Madaxweynaha dalka ahna Afhayeenka Baarlamaanka Soomaaliya Mudane Maxamed Sheekh cismaan ‘Jawaari’ oo kulanka ka hadlay ayaa dhamaan hay’adaha uu quseeyo dhameystirka Dastuurka ku adkeeyay in ay labo laabaan howshooda isla markaana shaqada Dastuurka ay soo geba gebeeyaan inta uusan dhamaan sanadkan 2015 si Dastuurka Afti loogu qaado ka hor sanadka 2016-ka.
Wasiirka Wasaaradda Dastuurka ee xukuumadda Soomaaliya Xuseen Maxamed Sheekh ‘ Badni’ ayaa geba gebadii kulanka sheegay in Wasaaradda Dastuurka iyo hay’adaha kale oo uu Dastuurka quseeyo ay isku afgarteen sidii howlaha lagu dhameystiraayo Dastuurka Qabiyada ah meel la isugu geyn lahaa si howsha Dastuurka loo soo gunaanado ka hor waqtiga yar oo hadda la haysto.
