Ku simaha Madaxweynaha dalka ahna Guddoomiyaha Baarlamaanka iyo Guddoomiye ku xigeenka Labaad ee Baarlamaanka Soomaaliya ayaa maanta magaalada Muqdisho kulammo kula qaatay quburro iyo mas’uuliyiin ka socota QM.
Ku simaha Madaxweynaha Dalka ahna Guddoomiyaha Golaha Shacabka Mudane Maxamed Sheekh Cusmaan โJawaariโ ayaa xafiiska ku qaabilay quburro ka socota QM waxaana kulanka uu ku saabsanaa qorshayasha Baarlamaanka Federaalka Soomaaliya ee la xiriira arrimaha doorashooyinka la doonayo iney dalka ka qabsoomaan sanadka 2016ka.
Mudane Maxamed Sheekh Cusmaan Jawaari ayaa u sheegay quburrada ka socday QM in Baarlamaanka Federaalka Soomaaliya ay ka go’an tahay gaarsiinta dalkan iney ka dhacdo doorasho xor ah marka la gaaro 2016ka waxaana uu ka codsaday iney ku gacan siiyaan QM iyo beesha caalamka guud ahaanba sidii ay Soomaaliya ku gaari laheyd yoolkaas la hiigsanayo.
Dhinaca kale Guddoomiye ku xigeenka Labaad ee Baarlamaanka Mudane Mahad Cabdalla Cawad ayaa isaguna xafiiska ku qaabilay mas’uuliyiin ka kala socotay hay’adda UNDP iyo UNSOM oo ah xafiiska jimciyada qurumaha ka dhaxeysa ee taageerrada Soomaaliya waxaana kulankaasi uu ku saabsanaa sidii loo taageeri lahaa guddiyada difaaca iyo amniga ee Baarlamaanka Soomaaliya.
Mudane Mahad Cabdalla Cawad Guddoomiye ku xigeenka Labaad ee Baarlaanka Federaalka Soomaaliya oo ka hadlay howlaha horyaalla guddiyada Difaaca iyo amniga ee Baarlamaanka oo la doonayo iney ka taageeraan hay’adahan ay ugu muhiimsan tahay in guddiyadan saameyn muuqataa ku yeeshaan dadaallada la doonayo in la iskugu dhafo Ciidammada Qalabka Sida ee Soomaaliya.
Guddiyada Joogtada ee Golaha Shacabka ayaa inta badan udub dhexaad u ah howlaha Baarlamaanka waxaana shaqooyinka guddiyada ay qabtaan intooda badan ka taageerra hay’adaha wadashaqeynta dhow la leh Baarlamaanka oo ay ugu horeyso hay’adda QM u qaabilsan hormarinta ee UNDP.
