Ku simaha Madaxweynaha dalka ahna Guddoomiyaha Baarlamaanka Soomaaliya Mudane Maxamed Sheekh Cismaan “ Jawaari” oo la hadlay Warbaahinta Qaranka ayaa cambeereeyay dagaalada ka dhacaya deegaanada gobolada dhexe ee dalka gaar ahaan kii maalmihii la soo dhaafay ka dhacayay deegaanka Guriceel ee gobolka Galgaduud.
Ku simaha Madaxweynaha ayaa ugu baaqay dhinacyada dagaalamaya in ay si shuruud la’aan ah u joojiyaan xabadda ayna isugu yimaadaan miiska wadahadalka.
“Waa in la isweydiiyaa sababta ay dagaaladan u soo laa laabteen, waxaan u mahadcelinaynaa odayaasha ku howlan joojinta dagaaladan, ganacsatada waxaan ugu baaqaynaa in ay ka qeyb qaataan daminta dagaaladan” ayuu yiri ku simaha Madaxweynaha dalka Maxamed Sheekh Cismaan.
Sidoo kale ku simaha Maxaweynaha Soomaaliya ahna Afhayeenka golaha shacabka ayaa waxaa uu sheegay in uu aaminsan yahay in wax kasta lagu xalinta karo si nabadeed haddii ay dad wada hadlaya ay ka go’an tahay in ay xal gaaraan.
