Muqdisho, 14, Feb, 2015…Ku-simaha Ra’iisul Wasaaraha ahna Ra’iisul Wasaare ku xigeenka Xukuumadda Federaalka Soomaaliya Mudane Maxamed Cumar Carte ayaa kulan la qaatay Agaasime Waaxeedyada Xafiiska Ra’iisul Wasaaraha, iyadoo kulanka diiradda lagu saaray sidii wada shaqeyn buuxda iyo is faham u dhex mari lahaa maamulka sare iyo waaxayaha kale duwan ee xafiiska.
Ugu horeyn, waxaa kulanka ka hadlay Xog-hayaha joogtada ee Xafiiska Ra’iisul Wasaaraha Mudane Maxamed Cali Nuur, wuuxuuna sheegay in la joogo xiligii xafiiska wax laga qaban lahaa, maadaama ay soo dhamaatay dhismihii xukuumadda iyo ansixinteedii, sidaas daraadeedna hadda kadib loo soo wada jeesan doono sidii dib u habeyn ballaaran loogu sameyn lahaa habsami u socodka shaqada xafiiska R/Wasaaraha.
Ku-simaha Ra’iisul Wasaaraha ahna Ra’iisul Wasaare ku xigeen Mudane Maxamed Cumar Carte, ayaa ku booriyay in shaqaaluhu la yimaadaan shaqo hufan islamarkaana ay sii xoojiyaan shaqooyinka xafiiska, isagoona tilmamaay wixii hadda ka danbeeya in qof waliba lagula xisaabtamayo waxa uu qabto.
“Kulankani ma noqon doono midkii ugu dambeeyay ee wuu sii socon doonaa, ujjeedka aan maanta u qabanayna kulanka waa in aan isbarano, dhagaystana Cabashooyinkiina, islamarkaana laga wada hadlo sidii kor loogu qaadi shaqada xafiiska oo laf dhabar u ah maamulka dowladnimo, ayna u noqoto tusaale wanaagsan wasaaradaha dowladu. Waxaana dib-u-habeyn lagu sameynayaa maamulka iyo shaqaalaha xafiiska, qof walba oo kasoo baxa waajibaadka saarana wuxuu heli doonaa xuquuqda uu leeyahay” ayuu yiri R/Wasaare ku xigeenku.
Ugu dambeyn, Agaasimayaasha Xafiiska Ra’iisul Wasaaraha ayaa uga mahadceliyey Ra’iisul Wasaare ku xigeenka tallo soo jeedintiisa ku aadan in dib u habayn ballaaran lagu sameeyo shaqada xafiiska, ayna diyaar u yihiin in ay kala qayb qaataan sidii loo hirgelin lahaa.
—DHAMAAD—
