Kulankaan oo ay wada yeesheen saraakiil ka tirsan ciidanka dowladda ayaa waxaa ka qeyb galay sii-hayaha Wasiirka Gaashandhigga iyo taliyaha ciidamada xoogga dalka, kaas oo ka dhacay magaalada Muqdisho, iyadoo ay goob joog ka ahaayeen sii-hayeyaasha Wasiirada kalluumaysiga, Tacliinta sare, Tamarta iyo xubno kale.
Kulanka ayaa intii uu socday saraakiishii ka qayb galay waxa ay ka hadleen xaaladda wadanka iyo sida looga wada shaqayn karo adkaynta ammaanka dalka, iyadoo ay sidoo kale ka qeyb galeen Taliyeyaasha ciidamada Badda iyo Cirka.
Taliyaha ciidanka xoogga dalka Jeneral Daahir Aadan Cilmi “Indho Qarshe” ayaa goobta ka sheegay in ciidanka qalabka sida ay awood u leeyihiin adkeynta amniga guud ee dalka, isagoo u mahadceliyay saraakiisha ciidanka qalabka sida ee Soomaaliya.
Ugu dambeyntii waxaa kulanka ka hadlay Sii-hayaha Wasiirka Gaashandhigga Soomaaliya Janaraal Maxamad Sheekh Xasan Xaamuud oo sheegay in ka Wasaarad ahaan ay xoogga saari doonaan qalabaynta ciidanka qalabka sida iyo sidii ay u helilahaayeen ciidanka dowladda tababarro dheeri ah.
