Kulankaan oo ka dhacay xarunta degmada Waabari ee gobolka Banaadir ayaa waxaa maanta ka qayb galay marwada madaxweynaha Jamhuuriyadda marwo Sahro Cumar Xasan sidoo kale waxaa ka qayb galay gudoomiyaha degmada Xaawa kiin Maxamuud Cali iyo gudoomiyaha haweenka gobolka Jawaahir Baarqab waxaana ka qayb galay ururrada haweenka qaar ka mid ah degmooyinka gobolka.
Ujeedka isu imaatinkaan ayaa ahaa in la xasuusto dadkii ku dhintay qarax kooxaha argagixisada ah ay la beegsadeen haween nadaafada ka shaqeynayay wadada Maka al Mukarama sanadkii 2008 dii halkaa oo ay ku geeriyoodeen dad gaaraya 15 ruux oo haween masaakiin ah u badnaa, waxaana ka soo qayb galay qaar ka mid ahaa haweenkii ku dhaawacmay iyo carruur iyana ku waayay qaraxaas bahalnimada ah hooyadii dhashay .
Qaar ka mid ah gudoomiyaasha ururada haweenka degmooyinka gobolka sida Waabari Hodan iyo Howlwadaag ayaa ka hadlay kulanka waxaana ay codsadeen in taageero loo muujiyo dadkii dhibku halkaa ka soo gaaray .
Gudoomiyaha degmada Waabari Xaawa kiin Maxamuud Cali iyo gudoomiyaha haweenka gobolka Jawaahir Baarqab ayaa iyana ka hadlay kulanka waxaana ay adkeeyeen in muhiimada ugu weyn ee isku imaatinka ay tahay in laga warqabo dadkii dalka iyaga oo u shaqeynaya dhibaatadu gaartay.
Ugu Dambeyntii ayaa waxaa ka hadlay kulanka marwada madaxweynaha dalka marwo Sahro Cumar Xasan waxaana ay alaah uga barisay dadkii dhintay in uu u naxariisto kuwa dhaawaca wali la jiifana uu caafiyo waxaana ay u balan qaaday in waxii loo awoodo aan laga reeban doonin dadkaas.
