Mamulka gobolka Shabeelaha Dhexe oo kaashanaya mas’uuliyiin ka tirsan dowladda Soomaaliya ayaa gogol nabadeed uga furay magaalada Jowhar labo beel oo walaalo ah oo dhawaan ku dagaallamay deegaanno hoostaga degmada Warshiikh.
Kulanka ayaa waxaa sidoo kale ka qeyb galay Xildhibaanno, maamulka Gobolka, kan degmada iyo qeybaha bulshada, waxaana kulanka diiradda lagu saaray sida lagu xalin karo
Malaaq Cali Malaaq Maxamed oo ah Malaaqa Xamar iyo Xamar-daye ayaa ka codsaday nabadoonada labada dhinac inay xaliyaan khilaafkooda, oo ay u istaagaan sidii waxyaabaha sababay gacan looga wada hadli lahaa.
Guddoomiyaha gobolka Shabeelaha dhexe Mudane Cali Cabdulaahi Xuseen “Cali Guudlaawe” ayaa ugu baaqay waxgaradka labada beelood in ay si cadaalad ku jirto ay u xaliyaan qilaafkooda, maamulka gobolkana uu diyaar la yahay wax walba oo ay u baahan yihiin.
Xildhibaan Qaasin Cali Nuur oo ka mid ah Xildhibaanada Soomaaliyeed oo isna madasha hadal ka jeediyay ayaa sheegay in odayaasha looga baahanyahay in ay wax walba xaliyaan, isla markaana shaqsigii ay u arkaan in uu kasoo horjeedo nabadda ay u soo gudbiyaan maamulka gobolka si tallaabo cad oo dhanka sharciga ah looga qaado.
“Alle ha idinku guuleeyo idinka howsha aad halkaan u joogtaan, oo anagana naga dhigo, kuwii ku guuleysta in howshan la soo afjaro, beelihii dagaallamay, waxaan leenahay qaata awaamiirta dowladda dhexe, tan gobolka oo waxkasta ha lagu dhameeyo wada hadal” ayuu yiri Xildhibaan Qaasim.
