Madaxda Dowlad Goboleedyada Puntland iyo Galmudug ayaa maanta lagu wadaa inay ka wada hadlaan sidii xal loogu heli lahaa xiisadda colaadeed ee magaalada Gaalkacyo, isla markaana ay dhameystiraan heshiiskii ay ku wada gaareen dalka Isutaga Imaaraadka Carabta.
Madaxweynayaasha Dowlad goboleedka Puntland iyo Galmudug oo shalay gaaray magaalada Gaalkacyo ayaa halkaasi kulamo gaar gaar ah la yeeshay Nabadoonada Gobolka, waxaana kulamadaasi ay ahaayeen kuwa la isku xog wareysaneyay.
Wariyaha Warbaahinta Qaranka ee Gobolka Mudug Cabdirisaaq Maxamed Axmed ayaa ku soo waramaya in saaka ay degantahay xaaladda magaalada Gaalkacyo, waxaana kulanka maanta ay Gaalkacyo ku yeelanayaan Cabdiweli Maxamed Cali Gaas iyo Cabdikariin Xuseen Guuleed, goob joog ka noqon doona Madax ka tirsan Xukuumadda Federaalka ah ee Soomaaliya iyo wakiilada beesha caalamka u jooda dalka.
