Dhallinyarada Soomaalida ee ku nool dalka South Africa ayaa kulan afur ah u sameeyay waxgaradka iyo aqoonyahanada Soomaalida ee ku nool magaalada Johannesburg.
Kulanka afurka waxaa soo qaban qaabiyay ururka dhallinyarada Soomaaliyeed ee ku nool dalka Koofur Afrika ayaa habeenkiii xalay ahaa, waxa uu ka dhacay magaalada Johannesburg gaar ahaana xaafada Mayfair, waxaana kasoo qeybgalay waxgarad kala duwan oo ka mid yihiin aqoonyahano iyo waliba guddoomiye ku xigeenkii hore ee gobolka Banaadir Cali Maxamed Cali โUgaas Caliโ.
Kulanka ayaa ujeedkiisa ahaa sidii la isaga kaashan lahaa wax ka qabashada xaaladaha dhallinyarada Soomaaliyeed ee ku nool deegaanada tuulooyinka ah iyo waliba dilalka iyo dhibaatooyinka ay dhaxdooda isku geystaan.
Ku-xigeenka Guddoomiyaha dhallinyarada Mudane Cabdullaahi Cabdi Xasan “Xarbi” ayaa warbaahinta Qaranka u sheegay in kulamada ay ahaayeen kuwa maalmahii lasoo dhaafay ay la yeelanayeen qeybaha kala duwan ee bulshada sidii iskaashi iyo wadajir ah loo wada yeelan lahaa arimo badan oo horyaala dhallinyarada.
Prof Cabduqaadir Cigaal oo barre ka ah mid ka mid ah Jaamacadaha ku yaala magaalada Johannesburg iyo Ugaas Cali Guddoomiye ku xigeenkii hore ee gobolka banaadir ayaa ugu baaqay dhallinyarada in buuxiyaan doorkii ay qaateen dhallinyaradii SYL, ayaga oo waxgaradkana ugu baaqay in laga faa’iideysto awoodda dhallinyarada.
Ugu Dambeyn Guddoomiyaha Dhallinyarada South Afrika Maxamed Cumar Talyaani ayaa sheegay in Ururka Dhallinyarada uu diyaar u yahay in wax laga qabto dhibaatooyinka dhallinyarada Soomaalida ku heysta gudaha dalka South Africa.
ย
C/laahi Maxamuud Amiin.
C/laahi Qorshe
Johannesburg -South Africa
