Wasiirka Wasaaradda Gaadiidka Cirka iyo Dhulka dowlad goboleedka Koonfur Galbeed Soomaaliya Xasan Xuseen Maxamed ayaa shir guddoomiyey kulan ay ka soo qeyb galeen maamulada degmooyinka Xudur, Tiyeeglow, Rabdhuure iyo kan gobolka bakool.
Intii uu socday kulanka waxa si guud looga warbixiyey xaaladaha amni iyo tan beni’aadannimo ee ka jirta deegaanada gobolka Bakool oo ay qeyb ka tahay go’doominta degmooyinka Xudur iyo Waajid, xaaladaha ay ku sugan yihiin kumanaan barakacayaal ah oo dulsaaran Degmada Xudur,
Sidoo kale shirka waxa kaloo aad loogu dheeraaday ka hadalka shacabkii dhowaan laga barakiciyey tuulooyin qarniyaal ay deganaayeen, abaarta iyo biyo la’aanta ay wajahayaan shacabka gobolka bakool.
Wasiirka oo su’aalo laga weydiiyey qorshaha Wasaaradda ee dhismaha garoonka diyaaradaha degmada Xudur oo howlo isxilqaan ah ay ka socodaan ayaa Wasiirka maamulka u sheegey in maalmaha soo socda labilaabayo dhismaha madaarka, kaa oo lagu dhisayo barnaamijka isxilqaan ka Wasaarad ahaanna ay xoojinayaan arrintaas.
Kulanka kaddib Guddoomiyaha Degmsda Xudur Maxamed Macalin oo Warbaahinta la wadaagay wayaabihii sida gaarka ah looga hadlay ayaa sheegay in Wasiirka uu balan qaaday in sida ugu dhaqsiyaha badan loo dhisayo garoonka diyaaradaha Xudur, isla markaana shamiindada galaysana uu Wasiirka diyaarad ku keenayo, maadaama magaalada Xudur uu gebi ahaanba qalabka dhismaha ka go’an yahay.
