Kulankan oo looga hadlayay daryeelka Naafada ayaa waxaa soo qabanqaabiyay Ururka daryeelka naafada Gobolada dhexe, iyadoo ay ka soo qayb galeen xubno ka tirsan golaha wasiirada Galmudug, maamulka degmada Cadaado iyo qaar ka mid ah dadka lixaadkoodu dhimanyahay ee Cadaado ku nool.
Xubno ka mid ah naafada oo kulankaas ka hadlay ayaa sheegay in xilligan duruuf kala duwan ay la nool yihiin naafadu aysana jirin cid ka war qabta.
Xaawa abtidoon Kadiye oo ka mid ah bulshada rayidka ah ayaa sheegtay inay muhiim tahay in bulshadu ku baraarugto xaalada naafada oo dhaqaalo aruurin loo sameeyo.
Axamed Cabdi Aaxamed ย oo xubin ka ah ururka kulankan soo qabanqaabiyay ayaa sheegay in qaar badan oo ka mid ah naafada ay noloshooda kaabi karaan hadii waxbarasho iyo xirafado loo abuuro.
Wasiirka gargaarka bini’aadanimada iyo daryeelka Naafada dawlad goboleedka Galmudug Shire Xirsi oo kulankaas ka hadlay ayaa sheegay in wasaaradu ay siyaasad iyo xeerar lagu dhawrayo xuquuqda naafada ku hawlantahay.
Ugu dambayn 20-ka mid naafada ayaa loo qaybiyay lacago kaalmo ah oo xubnaha ururka daryeelka naafadu iska soo aruuriyeen.
