Kulan Farsamo oo u dhexeeya Agaasimayaasha guud ee Wasaaradaha Dastuurka heer Federaal iyo Heer Dowladaha Xubnaha ka ah Federaalka ayaa maanta ka furmay magaalada Baydhabo ee Xarunta ku meel gaarka u ah Koonfur galbeed Soomaaliya.
Kulanka waxaa ka soo qayb galay Agaasimayaasha guud ee Wasaaradaha Dastuurka heer Federal iyo heer Dowlad Goboleed ee kala ah Agaasimaha guud ee Wasaaradda Dastuurka Xukuumadda Federaalka Soomaaliya, Agaasimayaasha guud ee Jubbaland, Koonfur Galbeed, Galmudug iyo Hir shabelle. Kulanka ayaa u jeeddadiisu tahay in la iska xog waraysto sida ugu haboon ee la iskaga kaashan karo arrimaha farsamo ee ku aadan howlaha dib-u-eegista dastuurka iyo doorka ay Agaasimayaasha guud ka qaadan karaan xoojinta xiriirka iyo wada shaqaynta Wasaaradaha dastuurka heer Federaal iyo heer dowladdaha xubnaha ka ah Federaalka.
Kulanka oo ah mid farsamo iyo is-xogwaraysi waxa uu socon doonaa muddo saddex maalin ah, iyadoo lagu lafa guri doono arrimaha farsamo iyo in lagu soo bandhigo heerka uu marayo dib-u-eegista dastuurka iyo qiimaynta horumarada laga garay iyo caqabadaha lala kulmay intii lagu guda jiray dib-u-eegista Dastuurka.
Agaasimayaasha Guud ee Wasaaradaha Dastuurka heer Federaal ayaa soo dhoweeyay kulanka waxa ayna xuseen in lagama maarmaan ay tahay in la xoojiyo xiriirka Wasaraadaha dastuurka ee heer Federaal iyo Heer Dowladaha Xubnaha ka ah Federaalka, isla markaana ay ballan qaadeen in ay doorkooda ka qaadan doonaan sidii loo dhamaytiri lahaa dib-u-eegista dastuurka. Sidoo kale waxa ay xuseen in ay Wasiirada dastuurka ee Wasaaradahooda ay kala shaqayn doonaan sidii heshiis farsamo looga gaari lahaa arrimaha u baahan wada xaajiiodyada siyaasadeed.
Dhanka kale, Agaasimaha Guud ee Wasaaradda arrimaha Dastuurka Xukuumadda Federaalka Soomaaliya mudane Maxamed Abuukar Zubeyr ayaa sheegay in ay muhiim tahay wada shaqynta agaasimayaasha guud ee Wasaraadaha Dastuurka ee heer Federaal iyo heer dowla goboleed, si loo kala sooco arrimaha farsamo iyo arrimaha siyaasadda.
“Natiijada laga filayo kulankaan ayaa ah in sare loo qaado wacyiga, fahanka iyo macluumaadka heerarka uumarayo dib-u-eegista dastuurka si la iskula jaanqaado”ayuu yuri Agaasimaha Guud ee Wasarradda Dastuurka Maxamed Abuukar Zubeyr.
Ugu dambayn Wasiir ku-xigeenka Wasaaradda Arrimaha Dastuurka Koonfur Galbeed Mudane Cabdullaahi Warsame oo kulanka furay ayaa uga mahadceliyay Agaasimayaasha guud sida ay u aqbaleen martigelinta shirka, waxa uuna sheegay in ay muhiim tahay wada shaqaynta Agaasimayaasha guud ee Wasaaradaha Dastuurka heer Federaal iyo heer dowlad goboleed si loo dhamaystiro Dastuurka ku meelgaarka ah.
