Kulanka Baarlamaanka ee maanta oo soo bilowday saakay ayaa goor dhow oo maqribnimadani ah soo gaba gaboobay, kaasi oo ay hortageen Ra’isul Wasaaraha Xukuumadda Federaalka Soomaaliya mudane Cumar C/rashiid Cali Sharmaarke, Wasiirka Amniga Gudaha C/risaaq Cumar Maxamed, Taliyaha Nabad Sugida iyo Sirdoonka Qaranka Qaranka Ee NISA Gen C/raxmaan Tuuryare islamarkaana su’aallo lagu weydiinayay.
Kulanka baarlamaanka ee maanta ayaa ahaa mid xasaasi ah oo ka duwan kulamadii hore oo ay yeelan jireen golaha baarlamaanka, waxaana aad diirada loogu saarayay ammaanka dalka iyo qorshayaasha lagu horumarinayo xaqiijinta amniga.
Inkastoo Saxaafadda ay dibad joog ka eheyd kulankaasi oo waqti badan qaatay oo labada gelin ee maanta ay ku shirsanaayeen xarunta golaha shacabka ee magaalada Muqdisho ayaa xildhibaanadu waxa ay ahaayeen kuwa su’aalla la xiriira ajanadaha maanta ee amniga weydiinayeen Ra’isul Wasaaraha iyo Mas’uuliyiinta kale ee dhinaca ammaanka.
Kulanka oo goor dhow soo gaba gaboobay ayaa waxaa lagu balamay maalinimada berito oo ah labada galin ay sii wadanayaan xildhibaanada kulankooda su’aallo weydiinta ah.
