Madaxweynaha Dowlada Hirshabelle Mudane Cali Guudlaawe Xuseen ayaa Gudoomiyay Shirka Golaha Wasiirada Dowladda Hirshabeelle oo maanta ka qabsoomay Degmada Cadale.
Shirka Golaha Wasiirada oo laga soo qeybgaliyay Xildhibaanada Baarlamaanka Hirshabeelle ee kasoo jeeda Degmada Cadale iyo Guddoomiyaha Maxkamada Sare ee Dowladda Hirshabeelle, ayaa looga hadlay Arrimaha amniga, Howlgallada Khawaarijta looga xoreynayo deegaanada Hirshabeelle, Dadaallada Xalinta Khilaafaadka, Dardargalinta iyo Isku Xirka Arrimaha Xasilinta Deegaanada Hirshabeelle, Dhismaha Golayaasha Deegaanka, iyo Dardargalinta tayeeynta hanaanka Garsoorka, si bulshadu u hesho adeeg Garsoor oo Cadaalad ah.
Guddoomiyaha Maxkamada Sare ee Dowladda Hirshabeelle Avv. Cabdullaahi Maxamuud Gacal, ayaa Golaha la wadaagay muhiimada uu Garsoorka u leeyahay Nabadda, daadajinta hanaanka garsoorka, dhismaha xabsiyo iyadoo Wasaaradda Cadaalada iyo Maxkamadda sare ay iska kaashan doonaan xoojinta Cadaaladda iyo Arrimaha Garsoorka.
Shirka Golaha Wasiiradda, ayaa lagu boggaadiyay dadaalada iyo shaqooyinka adag oo ay qabteen Guddigii Nabadeynta ee Golaha Wasiiradda oo Madaxweynaha Magacaabay ee ku baxay Dagaaladdii Xalinta Khilaafaad ee ka jiray deegaanada Hirshabeelle.
