Kulankan ayaa ahaa wajigii koowaad ee lagu daagfurayay Wadatashiga Siyaasadda Tabarada Qaranka kaasoo muddo aad u fog ay ugu dambeysay in laysku howlo amaba laga wada hadlo.
Madasha kulankan oo uu shir Guddoominayay Wasiirka Wasaaradda Shaqada iyo Arrimaha Bulshada Saalax Axmed Jaamac ayaa waxaa kasoo qeybgalay Wasiirka Shaqada ee Koonfur Galbeed, Wasiirka Shaqada ee Hirshabeelle, La Taliyayaasha Wasaaradda Shaqada iyo Arrimaha Bulshada, Agaasimayaasha Tabarada 26ka Wasaaradood ee Xukuumadda Federaalka ah Soomaaliya iyo Xubno ka tirsan beesha caalamka.
Agaasimaha Waaxda Tabarada Shaqada ee Wasaaradda Shaqada iyo Arrimaha Bulshada Ismaaciil Macalin Cabdullaahi ayaa ujeedka kulanka ku sheegay inuu yahay daahfurka Wadatshiga Siyaasadda Tabarada Qaranka, caqabadaha shaqo ee soo laalaabtay awgeed ayuu sheegay Agaasimaha in la door biday in xal lo helo lagana bilaabo qeybaha ugu muhimsan ee uu ugu horreeyo Tababarka Shaqaalaha Rayidka lana hergeliyo Siyaasadda Tababarka Qaranka.
Wasiirka Wasaaradda Shaqada iyo Arrimaha Bulshada Saalax Axmed Jaamac ayaa salaan iyo soo dhoweyn kaddib waxuu yiri: “Maanta waxaan isugu imaanay inaan ka baaraan dagno ama aan isku afgaranno Siyaasadda Tababarada Qaranka, waxaan kasoo shaqeeyay Hay’adaha Dowladda kuwooda kala duwan, waxaana arki jiray tababarro cayiman oo ujeeddo gooni ah laga lahaa ee ma arkin Siyaasad Tababar ee jirtay ama la hergeliyay, haddaba waa inaan isku afgarannaa sida loo heli lahaa Siyaasaddaas Tababar ee hirgasho”.
Wasiirka Shaqada ayaa yiri “Shaqaalaha Rayidka waxey xaq u leeyihiin in kor loo qaado xirfaddooda, Dowladdi dhexe buburkeedii kaddib ma jirin wax Tababaro ah ee loo qaban jiray Shaqaalaha, Tababarka Dowladdana waxey ku tiirsan yihiin NGO’s ama Hey’ado aan dowli aheyn oo Ajaanib ah, wax dhici karana ma ahan inaan sidaas kusii wadno ee waa inaan isweydiinnaa halkaan ka bilaabi laheyn imminkadanba sida ugu fudud ee aan u hergelin karno Siyaasadda Tababarka si ay shaqaalaha u helaan Tababar joogto ah kaddibna loo haqab tiro baahiyowga Dowladda si dhammeystiran”.
Wasiir Saalax ayaa soo jeediyay in dib loo yagleelo machadkii tababarka ee SIDAM kaasoo ahaa halka lagu soo saari jiray arday xirfadlayaal ah ee u diyaarsan baahida Dowladda.
Laba xubnood oo ka tirsan UNDP ayaa waxey madasha ka sheegeen in loo baahan yahay dalka in loo sameeyo Siyaasad Tababar ee la hirgeliyo, ayagoo sheegay in ay ka soo shaqeeyeen dalal dhowr ah ee dowladahoodii burbureen Sida Ciraq iyo Afghanistan, kuwaasi oo aaminsan iney Soomaaliya ay ka hirgelin karaan haddii ay la shaqeeyaan dadka ehelka u ah arrimahaasi ee loo igmaday.
Ugu dambeyn Wasiirka Shaqada iyo Arrimaha Bulshada, Xildhibaan Saalax Axmed Jaamac ayaa isu ballamiyay Agaasimaayaashii Tababarada ee leysugu wacay shirkan, asagoo u sheegay iney kasoo baaraan dagaan ay kasoo fikiraan halka laga jaanqaadi karo bilowga Siyaasadda Tababarka Qaranka, waxaana gabagabadii lagu ballamay in leysu yimaado maalinnimada Isniinta ah si loo uruuriyo fikradaha kahor kulanka wajigiisa labaad ee la qaban doono Arbacada soo socota.
