Kulanka Golaha guud ee Ururka Idaacadaha Dowlahada Carabta kalfadhigiisii caadiga ah ee 35-aad ayaa waxaa maanta oo Jimco ah lagu soo gabagabeeyay Caasimadda Tuunisiya ee Dalka Tuunis.
Kulankan oo ay ka qayb galayeen ku dhawaad 100 Hay’addo oo isugu jira Hay’adaha warbaahineed ee Dowlahada Carabta iyo warbaahinta gaarka loo leeyahay ee wadamada Carabta jira iyo Madax kale oo ka kala socotay Ururada Idaacadaha Yurub iyo Aasiya ayaa waxaa laga soo saaray gunaanadkii war-murtiyeed kulanka waxii looga hadlay ku saabsanaa.
Dowladda Soomaaliya oo sanadkan ka qayb gashay kulankan muddo 25 sano kadib ayaa waxaa uga qayb galay shirkaas Agaasimaha Waaxda Radio Muqdisho Mudane Cabdiraxiin Ciise Cadow iyo Uqaybsaha Warfaafinta Safaaradda Soomaaliya ee Dalka Suudaan Mudane Fiidow Maxamuud Fiidow.
Agaasime Cabdiraxiin Ciise Cadow Agaasimaha Waaxda Radio Muqdisho oo maanta qudbad ka jeediyay madasha ayaa ka warbixiyay xaalka dhabta ah ee Warbaahinta Soomaaliya ee Dowladda leedahay ay ku shaqayso isaga oo si gaar ah warbixin taariikhda iyo qaabkii loo aas-aasay ka bixiyay Radio Muqdisho iyo Teleefishinka Qaranka Soomaaliyeed ee SNTV.
Agaasimaha ayaa sharaxay in Warbaahinta Soomaaliya ay xiligan ku shaqayso xaalad xun marka loo eego ama la barbar dhigo Warbaahinta Walaalaheen Carbeed ay leeyihiin oo meelo badan ka dhisan, hasayeeshee Soomaaliya ay hada dhaqaaqday una baahan tahay gacan qabasho si horumar usii gaaraan.
Agaasimaha ayaa ka codsaday Wadamada Carabta in Satellite-yada Arabsat iyo Nilesat ay ka gacan siiyaan sidii warbaahinta Soomaaliya loogu dari lahaa oo waxii qalab ahna ay ururka u bixin lahaayeen.
Sidoo kale Agaasime Cabdiraxiin Cadow ayaa sheegay in radio Muqdisho laga gacansiiyo sidii Muujadaha Gaagaaban iyo kuwa dhexe loo siin lahaa Radio Muqdisho si codkiisa u gaaro Bulshada Soomaaliyeed ee wadamada fog fog kala jooga
Ururka Idaacadaha Dowladaha Carabta ayaa ah urur hoos taga Jaamacadda Carabta oo ay awoodiisa tahay in ay ka shaqeeyaan is dhaafsiga wararka wadamada carabta iyo la socoshada Warbaahinta Wadamada Carbeed.
