Ciidanka Kumaandooska Gor-Gor iyo guutooyinka 7-aad iyo 3-aad ee Xoogga dalka ayaa howlgal qorsheysan waxay ka sameeyeen deegaanno ka tirsan Gobolada Shabeelada Dhexe iyo Shabeelada Hoose.
Hawlgalka ayaa ciidanka waxay ku bur-buriyeen maxkamado beenaad kooxda Al-Shabaab ay lahaayeen, kuwaasi oo ay dadka uga yeeri jireen, isla markaana ku baadi jireen, waxaana sidoo kale ciidanka ay hawlgalka ku dileen horjoogihii argagixisada u qaabilsanaa deegaanka Basro oo hoos-yimaado Degmadda Balcad, iyagoo fashiliyay qaraxyo lagu soo raray gaari xamuul ah.
Taliyaha ciidanka xoogga Sareeyo Guuto Odawaa Yuusuf Raage, ayaa Idaacadda codka ciidamada qalabka sida u sheegay in ujeedka howlgalka uu yahay bur-burinta goobaha nabad diidka dadka ay ku baadaan, isagoo xusay in ciidanka ay cagta mariyeen goobo badan oo Al-Shabaab ay ku dhuuman jireen.
Jenaraal Odawaa ayaa sidoo kale tilmaamay in ciidanka xoogga ay u diyaarsan yihiin siddii dalka oo dhan looga sifeyn lahaa argagixisada laga itaalka roonaaday.
Geesiyaasha Xoogga dalka ayaa dar-dar geliyey hawlgallada lagu baacsanayo maleeshiyada Al-Shabaab.
