Kumaandooska Soomaaliya oo gacanta ku dhigay horjoogayaal ka tirsan Alshabaab

Ciidamada Kumandoosta Soomaaliya ayaa xalay hawlgal qorshaysan ka fuliyey gobolka Shabeelaha hoose, kaas oo lagu dilay horjoogayaal ka tirsan maleeshiyada Al-shabaab.

Hawlgalkan oo ka dhacay degmada Awdheegle ee gobolka Shabeelaha hoose, gaar ahaan meel ay ku dhuumaalaysanayeen horjoogayaal ka tirsan xagjirka Al-shabaab ayaa lagu soo qabtay labo horjooge sare oo maleeshiyada Shabaab ka tirsanaa.

Sida ay warbaahinta qaranka ay u xaqiijiyeen saraakiil ka tirsan Xoogga Dalka,Xubnaha ay soo qabteen ciidanka Xooga Dalka,gaar ahaan qeybtoodi Kumaandooska ah oo sida gaarka ah u tababaran ayaa waxaa ay kala yihiin Cabdi-kariin Abuu Xamza oo ah Madaxa Al-Shabaab u qaabilsan Maaliyadda iyo Muudey oo ah taliyaha u qaabilsan Amniyaatka iyo dilalka qorsheysan.

Horjoogayaashan la soo qabtay ayaa la sheegay in ay kamid ahaayeen horjoogayaasha Alshabaab ee lagu soo tababaray dalka dibadiisa,gaar ahaan Afganistaan,sida laga soo xigtay mas’uuliyiin ka tirsan maamulka Gobolka Shabeelada Hoose.

Waxaa uu ahaa hawlgal xirfadiisu sarayso, kaas oo suura galiyey in la soo qabto horjoogayaashan iyaga oo nool, waxxaana raggan oo macluumaad badan ka haya kooxda Al-shabaab haatan ku socda baaritaan.

Gobolada Dalka waxaa ka soconaya howlgalo ballaaran oo lagu baacsanayo maleeshiyada Alshabaab,iyadoo maalmihii la soo dhaafayna ay howlgalo qorsheysan ay ka kala dheceen deegaano ka tirsan K/Galbeed iyo Jubbaland.

SONNA.