Wafdi ka socda Wasaaradda Arrimaaha Gudaha iyo Federaalka oo uu hogaaminayo Agaasimaha xiriirka ee Wasaaradda Mudane Cabdifataax Cali Xasan ayaa maanta gaaray degmada Balcad ee gobolka Shabeelaha Dhexe.
Ujeedada Wafdiga ayaa aheyd in ay ka sameeyaan degmada Balcad wacyigelin ku aadan dhismaha golaha deegaanka ee degmada Balcad.
Xaflad balaaran oo lagu qabtay Xarunta degmada Balcad ayaa waxaa lagu furey qorshaha wacyigelinta ah oo ay wadaan mas’uuliyiinta ka tirsan Wasaaradda arrimaha gudaha iyo Federaalka kaas oo ay ka qeybgaleen qeybaha bulshada oo ku nool degmadaasi.
Agaasime Cabdifataax oo furay kulanka ayaa sharaxaad dheeraad ah ka bixiyay qorshaha maamul sameynta iyo habraaca maamulada iyadoo maamulka iyo bulshada ku dhaqan degmada Balcad ay si weyn u soo dhaweeyeen hindiaha Wasaaradda arrimaha gudaha ee xukuumadda Soomaaliya.
Sidoo kale, Canab Axmed Ciise oo ah agaasimaha horumarinta dowladda wanaaga oo kulanka ka hadashay ayaa sheegay in dadka Balcad degan ay yihiin dad ay ka go’an tahay in ay sameystaan maamulka degmadooda.
Dhanka kale ku simaha Gudoomiyaha ahna Gudoomiye ku xigeenka degmada Balcad ayaa dhankiisa soo dhaweeyay qorshaha wasaaradda una hambalyeeyay Wasaaradda Arrimaha gudaha dadaalka ay ku hormarinayso degmooyinka dalka.
