Wasiirka Wasaaradda Waxbarashada Hiddaha iyo Tacliinta sare ee Xukuumadda Federaalka Soomaaliya Mudane Faarax Sheekh Cabduqaadir ayaa maanta kormeer uu ugu kuur galayo hannaanka shaqo iyo tayada Waxbarashada ay bixiyaan ku tagay dugsiyada hoostaga Wasaaradda Waxabarashada kuna yaalla caasimada Muqdisho ee kala ah, dugsiga gabdhaha Agoonta ee Boondheere, iskuulka Bartamaha, dugsiga 20-ka December, 21-ka Octobar, iskuul Jabuuti iyo Yaasiin Cismaan oo dhammaantood waxbarasho bilaash ah siiya kumanaan ka mid ah dhallinyarada Soomaaliyeed.
Wasiirka ayaa mid mid u booqday Fasallada, dhismayaasha hoyga ee lagu xannaaneeyo caruurta agoonta ah iyo qeybaha maamulka ee dugsiyada, waxa uuna kula dardaarmay maamuladda iskuulaada in ay muhiimad gaar ah siiyaan barbaarinta ubadka, iyada oo xoogga la saarayo in caruurta si wanaagsan loo baro diinateenna suuban ee Islaamka.
Related posts
Wasiir Faarax Sheekh Cabdulqaadir ayaa ku bogaadiyay maamulada iyo macallimiinta iskuulada dhabar adeygooda iyo sida ay u barbaarinayaan mustaqbalka dalka, asiga oo faray in aan wax dhaqaale ah laga qaadin Ardeyda wax ka barata dugsiyada ay maamulaan, sidoo kale Wasiirka ayaa tilmaamay in dhawaan Wasaaraddu ay soo saaridoonto amar ku aaddan arrintaasi.
Dhankooda maamulada iyo Macallimiinta dugsiyada ayaa wasiirka uga mahadceliyay booqashadiisa iyaga oo la wadaagay warbixino dhammeystiran oo ku aadan hannaanka shaqo ee dugsiyada, caqabadaha ay la kulmaan iyo hiigsigooda dabar goynta jahliga.
Kormeerkan waxaa ku wehliyay wasiirka, Agaasimaha guud ee Wasaaradda Waxbarashada mudane Maxamed Caabbi Xasan.
