Gudoomiyaha Degmada Balcad, Qaasim Cali Nuur ayaa faahfaahin ka bixiyay shir looga hadlayey sidii wax looga qaban lahaa xaaladda amni ee Degmada oo ay maalmahan ka jireen shaqaaqooyin.
Shirkan oo uu soo qaban qaabiyay Maamulka Degmada ayaa waxaa ka qeyb galay qaar ka mid ah wax garadka, saraakiisha ciidamada qalabka sida iyo kuwa Nabad ilaalinta Midowga Afrika ee AMISOM.
Guddoomiye, Qaasim , oo u warramayay Warbaahinta Qaranka ayaa sheegay in shirka looga hadlay sidii la isaga kaashan lahaa amniga iyo sidii loo heli lahaa isku duubni dhexmarta shacabka Degmada, Maamulka iyo Ciidamada.
Qodobada ka soo baxay kulanka ayuu sheegay in ay ka mid ahaayeen, in aan qori lagu dhex wadan karin magaalada gudaheeda, in aan xabbad lagu dhex ridi karin iyo in aan gabbaad la siin qof xiriir la leh Al-Shabaab.
Guddoomiyaha ayaa digniin culus u diray debleyda dhigata isbaarooyinka sharci darrada ah, wuxuuna sheegay in ciddii lagu arko jidgooyo ay ula dagaallamayaan sida kooxda Al-Shabaab oo kale, isla markaana laga qaadi doono tallaabo adag.
