Duqa Dagmada Gaalkacyo mudane Cabdiraxmaan Sheekh Xasan oo ay wehliyaan Howlwadeenno ka tirsan Wasaaradda Caafimaadka Galmudug ayaa kormeer ku aadan la socodka adeegyada caafimaad ee ay u baahi qabaan bulshada Degmada Gaalkacyo ku tagay isbitaalka weyn ee magaalada, kaas oo maalmihii u danbeeyay la soo gaarsiiyay bukaanno farabadan lagana kala keenay deegaanno kala duwan oo ka tirsan Goballada dhaxe ee dalka iyo qaar ka mida kuwa dhulka ismaamulka Soomaali Galbeed Ethiopia.
Duqa degmada Gaalkacyo ayaa intii uu ku guda jiray kormeerkiisa waxa uu booqday qeybaha kala duwan ee isbitaalka, waxaana intii uu kormeerka ku guda jiray warbixino la xariira howlaha shaqo ee isbitaalka, xaaladda bukaanada isbitaalka ku jira ka dhageeystay dhakhaatiirta iyo howlwadeenada caafimaad ee isbitaalka
Isku duwaha Wasaaradda Caafimaadka ee Degmada Gaalkacyo Dr Cabdikariim Abshir Ciise oo kormeerka kadib la hadlay Warbaahinta Qaranka ayaa sheegay in isbitaalka ay ka jirto daawo yari, loona baahanyahay in laga jawaabo.
Duqa Dagmada Gaalkacyo Cabdiraxmaan Sheekh Xasan ayaa isna sharaxaad buuxda ka bixiyay culeysyada adeegyada caafimaad ee ka jira isbitaalka, isagoo dhanka kalana baaq u diray Hay’adaha ka shaqeeya Caafimaadka, Dowladda Fadaraalka, Ganacsatada iyo Qurba joogta deegaanka inay wax ka qabtaan baahiyaha ka jirta Isbitaalka guud ee magaalada.
