Maamulka degmada Gaalkacyo ee Galmudug oo dadaal aad u weyn ugu jiray bilihii u danbeeyay sidii bulshada loogu wacyi galin lahaa ka feejignaanta khatarta caabuqa COVID 19 oo noqday mid si weyn faafitaankiisa looga dareemayay magaalada Gaalkacyo ayaa waxaa maanta mas’uuliyiinta maamulka degmadu ay kulan la qaateen xubnno ka socday bahda caafimaadka culumaa udiinka iyo aqoonyahanno.
Kulankan oo ahaa mid wadatashi ah isla markaana ku saabsanaa sida ugu haboon ee loo waajihi karo ka hortagga COVID 19 sidoo kalana looga qeyb qaadan lahaa baahiyaha ka jira isbitaalka Gaalkacyo gaar ahaan adeegyada lama huraanka u ah daryeelka iyo daaweeynta bukaanadda qaba caabuqa COVID 19 ee yaala qeybta bukaanadda qaba xanuunka COVID 19 ee isbitaalka Gaalkacyo oo ay baahi weyn ka jirto ayaa maanta lagu qabtay magaalada Gaalkacyo.
Agaasimaha isbitaalka weyn ee Gaalkacyo Dr Maxamed Cabdi Axmed ayaa sharaxaad ka bixiyay baahiyadda ka jira isbitaalka, isagoona xusay in qalabka neef siinta bukaanadda ay tahay baahida ugu xooggan ee xiligaan ka jirta isbitaalka maadaama ay sii kordhayaan bukaanada uu hayo cudurka COVID-19.
Guddoomiyaha degmada Gaalkacyo Cabdiraxmaan Sheekh Xasan Jimcaale iyo guddoomiyaha gobalka Mudug ee dowlad gobaleedka Soomaaliyeed ee Galmudug Cabdiraxmaan Cali Diiriye Isxal ayaa gunanadkii kulanka kasoo jeediyo talooyinka muhiimka u ah ka hortaga khatarta COVID-19.
