Olole nadaafadeed oo qeyb ka ah Isxilqaan kaas oo lagu nadiifinayo laamiyada iyo xaafadaha ayaa ka bilaawday degmada Kaaraan ee gobolka Banaadir.
Guddoomiyaha Haweenka degmada Kaaraan, Suldaano Axmed Maxamed ayaa sheegtay in haweenka degmada kaaraan ay u taaganyihiin horumarinta iyo nadaafadda degmada,iyadoo xustay in ujeedka ololahaan uu yahay bilic soo celinta degmada.
Guddoomiye ku xigeenka arrimaha bulshada degmada Kaaraan, Sowdo Maxamuud Gaabow ayaa sheegtay in ololahaan nadaafadeed ay ka sameeyeen isgoyska sanca ilaa suuqa degmada, waxaa ayna tilmaamtay in ay sii dardar geli doonaan.
Guddoomiyaha degmada Kaaraan, Abshir Maxamed Maxamuud ayaa shacabka degmada uga mahadceliyay shaqada wanaagsan ee ay ka wadaan degmada iyo wada shaqeynta fiican ee kala dhaxeysa, isagoo kula dardaarmay iney si wadajir ah u ilaaliyaan nadaafadda deegaanka.
