Maamulka degmada Mahaddaay ee gobolka Shabeelaha Dhexe ayaa ugu baaqay madaxda Dowladda Federaalka Soomaaliya in adeegyada bulshada ay ka hirgeliyaan deegaanadii laga xoreeyay maleeshiyada Al-Shabaab ee Degmada Hoosyimaada, si bulshada ay u hesho adeegyada aas aasiga u ah nolosha.
Guddoomiyaha Degmada Mahaddaay Axmed Xuseen Afrax oo la hadlay Radio Muqdisho ayaa sheegay in dhawaan ciidamada xoogga dalka iyo kuwa AMISOM ay la wareegeen deegaanno dhowr ah oo ay Shabaabku ku dhibaateyn jireen shacabka, waxaana uu intaa ku daray in deegaannada laga xoreeyay Al-Shabaab loo baahanyahay in laga hirgeliyo adeegyada bulshada.
“Ceel baraf, Meeyrtuugo, Cali-fooldheere, Caadleey, Qurac Madoobe iyo kuwa kale , mana ka jirto degaannadaasi adeegyadii bulshada sida caafimaadka, waxbarashada iyo waxyeelo kale oo muhiim u ah bulshada, maadaama sanado badan ay dhibaato ku hayeen” ayuu yiri Axmed Xuseen Afrax Guddoomiyaha Degmada Mahadaay
Guddoomiyaha Degmada Mahaddaay ayaa ugu baaqay dowladda Federaalka ah ee Soomaaliya in maamulkooda gacan lagu siiyo sidii dib loogu soo celin lahaa adeegyadii kala duwanaa ee ay u baahnaayeen shacabka, isla markaana ay jiraan waddooyin dib u dayactir ah u baahan.
