Maamulka degmada Maxaas ee gobalka Hiiraan ayaa ka codsaday Dowladda Fedaraalka ah ee Soomaaliya iyo hay’adaha samafalka ah inay gacan ka geestaan sidii wax looga qaban lahaa daawo yarida ka jirta degmadaasi.
Guddoomiye ku-xigeenka degmada Maxaas ee gobolka Hiiraan Daahir Maxamed Cali oo lahadlay Warbaahinta Qaranka ayaa sheegay in degmada iyo deegaannada hoostaga ay ka dilaacday cudurka suban biyoodka, isla markaana aysan jirin adeegyo caafimaad oo buuxin kara baahida caafimaad darri ee ka jirta degmada Maxaas.
Daahir ayaa tilmaamay in bulshada ku nool degmada Maxaas ay xilligan soo wajahday xaalado caafimaad darri, loona baahanyahay in loo fidiyo gurmad beni’aadanimo, waxaana uu dowladda iyo hay’adaha samafalka ka codsaday inay gurmad deg deg ah la soo gaaraan bulshada ku dhibaateysan degmada Maxaas.
