Duqa Degmada Gaalkacyo ee Galmudug Mudane Cabdiraxmaan Sheekh Xasan oo uu weheliyo xoghayaha Dowladda hoose Mudane Cabdiqani Axmed Maxamuud ayaa shir gudoomiyay kulan heerkiisu sareeyo oo u dhexeeyay Dowladda hoose ee Degmada Gaalkacyo iyo hay,adaha Caalamigaa ee hoostaga Qaramada Midoobay iyo kuwa maxaligaa ee ka hawlgala Gaalkacyo kana dhacay xarunta Maamulka Degmada , kaasi oo diiradda lagu saaray, qiimeynta iyo dib u eegista mashaariicda hadda socota, caqabadaha hortaagan , isla xisaabtanka iyo horumarinta Degmada Gaalkacyo.
Dhamaan wakiilada ka socday hay’adaha Caalamigaa ee UN-ka iyo kuwa maxaligaa ayaa shirka ku soo bandhigay mashaariicda horumarineed ee ay ka wadaan Degmada Gaalkacyo iyo caqabadaha hortaagan ee fududeynta u baahan iyo yoolkooda ku aadan taageerista hawlaha horumarineed ee ay waddo Dowladda hoose ee Degmada Gaalkacyo , iyagoo maamulka degmada ku amaanay wada shaqaynta uu hay’adaha caalamigaa iyo kuwa maxaligaa la leeyahay iyo shaqada baaxadda leh ee ka socota xarunta Dowladda hoose ee shirku ka dhacay.
Duqa Degmada Gaalkacyo Mudane Cabdiraxmaan Sheekh Xasan oo shirka soo xiray ayaa ugu horeyn hay’adaha Caalamigaa iyo kuwa maxaligaa ee ka hawlgala Gaalkacyo kaga mahadceliyay soo ajiibitaanka kulanka ay isugu yeertay Dowladda hoose iyo wada shaqaynta ay la leeyihiin Maamulka Degmada , isagoo shaaca ka qaaday in ay dib u eegis dhameystiran iyo isla xisaabtan u baahan yihiin mashaariicda hadda ka socota Gaalkacyo si looga jawaabo baahiyaha aas aasigaa ee bulshada , loona taageero horumarinta adeegyada danta guud ee ay bulshada baahida weyn u qabto , haddana ay dardar gelinta kuwada Dowladda hoose ee Degmada Gaalkacyo.
