Wasiirka Warfaafinta dowlad goboleedka Galmudug Max’uud aadan Cusmaan Masagawaay oo la hadlay Radio Muqdisho ayaa sheegay in ay maqleen dagaalada ka dhacay xalay ilaa saakay magaalada Dhuusa-marreeb, waxaase uu sheegay in aysan qayb ka ahayn dagaaladaasi.
“ Waan maqleynay eedeynta lakin waxaan leenahay waa mid aan sal iyo raad toona lahayn, sargaal ciidamo gooni ah wata ayaa naloo sheegay in dagaalka uu qaaday balse anaga waxba kama ogin, mana jirto sabab aan u inkirno haddaan qayb ka nahay, maamulkeenuna diyaar uma ahan in dhuusa-marreeb ay dagaal ku aado, waxaan ku aadeynaa wax ka baddalan” ayuu yiri wasiirka warfaafinta maamulka Galmudug Max’uud aadan Cusmaan Masagawaay.
Wasiirka oo hadalkiisa sii wata ayaa yiri” dhuusa-marreeb waa caasimadda maamulka Galmudug, mana ka mid ahan qorshaheyna in aan dagaal ku aadno, waxaan rabnaa wada hadal iyo xal nabadeed in aan ku aadno, marwalbana qorshaheenu waxa uu yahay in aan la hadalno cidkastaa oo wada hadal ogol, marka laga reebo shabaab oo aan ogoleyn wada hadal iyo walaalnimo”
Ugu dambeyn wasiirka Warfaafinta maamul goboleedka Galmudug Max’uud aadan Cusmaan Masagawaay ayaa ugu baaqay dhinacyada ku dagaalamay magaalada dhuusa-marreeb in ay dadka xabadda ka daayaan, oo ay dagaalka wada hadal ku badalaan” waa in aan baranaaa dabeecadda wada hadalka ee aanan gacan ka hadal wax ku raadin, waxaana fariintaas u dirayaa dadka ku dagaalamayaa dhuusa-mareeb” ayuu yiri wasiirka warfaafinta Galmudug.
Hadalka wasiirka warfaafinta Galmudug ayaa imaanaya xilli xalay ilaa maanta ay dagaalo ka dheceen magaalada dhuusa-marreeb ee xarunta gobolka Galgaduud, waxaana dagaaladaasi ay sababeen dhimasho, dhaawac iyo barakac dad weyne, waxeyna mas’uuliyiinta Ehlu sunna ee ku sugan dhuusa-marreeb ay ku eedeyeen dagaaladaasi maamulka Galmudug, iyadoo Galmudugna ay wax kama jiraan ku tilmaantay.
