Madaxweyne ku xigeenka dowlad goboleedka Galmudug Maxamed Xaashi Cabdi.oo shir Jaraa’id qabtay ayaa soo dhaweeyay shirkii madasha wadatashiga ee shalay lagu soo gebagebeeyay magaalada Muqdisho.
Madaxweyne ku xigeenka ayaa shirkiisa Jaraa’id ku sheegay in maamulka Galmudug uu soo dhaweeynayo go’aannada ka soo baxay shirkaasi, isagoo wax wanaagsan ku tilmaamay in talada dib loogu soo celiyo shacabka Soomaaliyeed,
“Haddaan nahay maamul goboleedka Galmudug runtii aad iyo aadaan usoo dhaweeyneynaa taladaasi, madaxdii noo meteleysana runtii aad iyo aadeey u mahadsanyihiin iyo dhamaan madaxda Soomaaliyeed ee dhan, waxaana leenahay waa tallaabo aad u fiican oo hore loo qaaday” ayuu yiri madaxweyne ku xigeenka Galmudug.
Dhinaca kale madaxweyne ku xigeenka ayaa soo hadalqaaday waxqabadka maamulka Galmudug muddada sadexda bilood ah ee uu jiray, wuxuuna xusay in maamulku ku tallaabsaday horumarro kala duwan oo amnigu ugu horeeyo.
“Waxaad la socotaan in ciidamadeenu ay dib u soo celiyeen deegaanno badan sida deegaanka Camaaro, deegaanka Bacaadweyn oo dib looga celiyay kuwii nabad diidka iyo deegaanka Wabxo oo shalay laga sifeeyay Cadowga, iyadoo howlgalkaasi fuliyeen ciidamada dowlada kuwa AMISOM iyo ciidamada Galmudug oo iskaashanaya” ayuu yiri madaxweyne ku xigeenka Galmudug Maxamed Xaashi.
