Maamulka gobolka Banaadir ayaa howlgeliyay gaari casri ah oo loogu talagalay cilad bixinta nalalka ku shaqeeya cad-ceeda, iyadoo guddoomiyaha gobolka uu xalay kormeer howleed ku tegay qaar ka mid ah waddooyinka caasimadda oo ay ka socotay cilad bixin xagga nalalka Ileyska ku shaqeeya.
Guddoomiyaha Gobolka Mudane Xasan Maxamed Xuseen “Muungaab” oo ay wehliyaan mas’uuliyiin ka tirsan maamulka Gobolka ayaa goobaha ay kormeerka ku tegeen ka mid ah waddada isku xirta Igoyska Fagax iyo Ex-koontarool Balcad ee magaalada Muqdisho, halkaasi oo ay ka socdeen howlo lagu cilad bixinayo qaar ka mid ah nalalka cad ceedda ku shaqeeya ee laga hirgeliyay Muqdisho.
Agaasimaha howlaha guud ee maamulka Gobolka Banaadir Cumar Sheekh Xuseen oo Warbaahinta la hadlay ayaa sheegay in ay meel wanaagsan marayso qorshaha lagu cilad bixinayo nalalka cadceedda ku shaqeeya, waxaana uu intaa ku daray in howshan ay u adeegsanayaan qalab casri ah.
Guddoomiyaha Gobolka Banaadir ahna duqa Muqdisho oo kormeerka kaddib la hadlay Warbaahinta ayaa ugu horeyn ciidamada amniga uga mahadceliyay sugidda Nabadgelyada, taasi oo keentay in xilli habeen ah ay shaqaaluhu cilad bixin ku sameeyaan nalalka cadceedda ku shaqeeya.
