Maamulka Gobolka Hiiraan ayaa waxa uu ku guuleystay in uu kala qaado maleeshiyo beeleed maalmahan ku dagaalamayey Duleedka Magaalada Baladweyne ee Xarunta Gobolka Hiiraan.
Gudoomiyaha Gobolka Hiiraan Mudane Cali jeyte Cismaan , Gudiga amniga , odayaasha dhaqanka Saraakiisha ciidanka booliiska iyo Kuwa AMISOM ayaa saakay ku baxay deegaanka uu dagaalka Ku dhax marayey labada Maleeshiyo beeleed ayagoo ku guuleystay in ay kala qaadaan Maleeshiyaadkii isku horfadhiyey duleedka Magaalada Baladweyne.
Corneel Cabdi Axmed Weheliye oo ah afahayeenka gudiga amniga ayaa sheegay in ay goobta tageen ayadoo dagaalka socdo isla markaana ay ku guuleysteen in ay kala qaadaan labadadii maleeshiyo beeleed asaga oo xusay in uu goobta uga geeriyooday hal askari oo ka tirsan Ciidanka Booliskiisa Soomaaliyeed.
“Waxaan amar ku bixineynaa cidii jabisana aanan uga aali doonin oo aan kula xisaabtami doonaa , labada maleeshiyo waan kala qaadnay beesha Jijaale waxaan geynay Sarmajabaaley Halka aan beesha Gaaljecelna geeynay Burjada ciilka cidii heshiiskaas jabiso waxaan ka qaadaynaa talaabo sharciga waafaqsan oo aan cidna loogu aabo yeeleyn” ayuu Yiri Gudoomiye Cali Jeyte.
