Maamulka gobolka Shabeelaha dhexe ayaa deeq dawo ah ku wareejiyay maamulka degmada Balcad si loogu daweeyo dad uu soo ritay cudurka Kolooraha ama daacuun caloolaha oo ka dillaacay deegaan ka tirsan degmadaasi.
Guddoomiyaha gobolka Sh/dhexe Cali Cabdulaahi Xuseen Guudlaawe ayaa deeqdan dawada ah oo ka timid dowladda Sucuudiga soona marsiisay wasaaradda caafimaadka ku wareejiyay gudoomiyaha degmada Balcad Maxamed Maxamuud Saneey, wuxuuna sheegay guddoomiye Guudlaawe in dawadan la wada gaarsiin doono dhamaan degmooyinka gobolka Sh/dhexe.
“Qeybtii naga soo gaartay dawadii ka timid dalka Sucuudiga ee wasaaradda caafimaadka ay nagu soo wareejisay waxaan u qeybinay degmooyinka gobolka shabeelaha dhexe degmo kastana qeybteeda ayaan ku wareejinaynay maantana gudoomiyaha degmada Balcad ayaan ku wareejinay qeybti degmada” ayuu yiri gudoomiye Guudlaawe.
Gudoomiyaha degmada Balcad Maxamed Maxamed Saneey oo guddoomay dawaddaasi ayaa maamulka gobolka, wasaaradda caafimaadka iyo dowladda Sucuudiga uga mahadceliyay dawadaasi oo uu sheegay in la soo gaarsiiyay waqtigii ay ugu baahida badnaayeen.
